يقول الشاعر

خل الدعاوي يارفيقي سهالات

والله مابه شي يجرح ويقهر
ريح ضميرك لاتفكر فالازمات
الهم ليا شلته مع الوقت يكبر
لاتكترث من هرج عاذل وشمات
من كان قد القول فالوجه يظهر
لاتلتفت لو تسمع اصوات واصوات
واصل ولا تشتاط من حس الاغبر
كثف جهودك وانت قد المهمات
وعانق سماء الابداع يا طير واشهر
الناس مايعطونك الا لأجل هات
واكثرهم يشوفون حسنتك منكر
لانك وصلت يلحقونك ملامات
ولانك قدرت وغيرك يقول ماقدر
ولانك كسبت بيجيك منهم عداوات
ولانك برزت اسمك على كل منبر
ولانك تجاوزت المحن والصعوبات
ولانك شهرت تحط من تحت مجهر
ولانك تعليت الجبال المنيفات
ولانك بعد هذي يحق تفخر
افخر وتلقى من يشابهك بالذات
على عيال بليس منتاب مجبر
اللي مراجلهم هياط ودعايات
بالكذب والتحريف مغير مظهر
حنا بوقتٍ فيه حتى العلاقات
من غير وجه لوجه كل يوم تكثر
اغلب علاقتنا علاقة قروبات
تسلم ومن يقرا وتعذر وتنذر
الوقت هذا غير عن كل الاوقات
مدري عنه واللي على قوله أقدر
عش مابقى لك واغتنم كل مافات
العمر مثل الظل لو طال يقصر
احفظ مواجيبك وصل الصلوات
لاضاق بك وقتك قل اللهُ أكبر
وباقي العلوم ان راحت والا ولو جات
سهله ولو كبرت تعود وتصغر