.
.
.
.
صباحكم | مسائكم ، خير ورضا يارب
الموضوع ارتجالي فاذا فيه أخطاء سواء املائيه أو نحوية فالتمسوا لي العذر
أول شي كنت بنزله في قسم النواعم بس على آخر لحظه قررت أكتبه هنا وعدلت بعض الأشياء
لتعم الفائده للجميع
يقول المثل وراء كل رجل عظيم امرأه ،،،
وأنا أقول وراء كل منتدى ناجح أعضاء عظماء << كانت نواعم عظيمات بس غيّرناها لتتناسب مع المكان
أمنيتي في عام 2011 يصير منتدى بلقرن من المنتديات الكبيره اللي الناس تزورها تلاقي الجديد والمفيد
وتصير المواضيع تنقل منها موب تنقل لها
وطبعاً يد وحده ماتصفق ،،،،
فخلونا نتعاون ونحاول قد مانقدر نظهر المنتدى في أفضل صوره
خلونا نجرب شهر ماننقل مواضيع ونحاول نشتغل كلنا ونتساعد وكل واحد يفيدنا باللي عنده لو شي بسيط
وربي ملينا من المواضيع المكرره والمنقوله المشكله بعضها مكتوبه من عام الف وحطبة
خلاص نبغي شي جديد شي حصري لبلقرن بس
احنا مبدعين ومتميزين وش ينقصنا مانسوي مواضيع ،،،
شوفوا هالموضوع اثبات لكلامي
عندنا أعلى الشهادات وجميع التخصصات وش فايدتها اذا مااستغلينها ونفعنا فيها أنفسنا وغيرنا
والله المواضيع اللي تكون باجتهاد العضو تعجب الكل حتى لو كانت بسيطه جداً
بعكس المواضيع النسخ واللصق ممله جداً مهما كانت مميزه والواحد قرأها 295757403857 مره في 96845837498 منتدى
طيب وش الفايده ،،،
مافيه مثل الواحد يسوي موضوعه بنفسه يبحث ويتعب ويصور ويشتغل لها متعه خآآآصه
يحس انه قدم شي مفيد بتعبه ومجهوده مو بس نسخ ولصق لمجهود غيره
ولو تكون مشاركاتك 100 على مواضيع ومشاركات مفيده
أفضل من انها تكون 1000 على مواضيع منقولة
بتقولون مانعرف نكتب مواضيع ،،،،، طيب خطوه خطوه وشوي شوي وبتصيرون تووب ان شاء الله
أنا أقولكم كيف ؟؟؟
أنا أقولكم كيف ؟؟؟
كل واحد يمسك له القسم اللي يحس انه فاهم ومبدع فيه
ويركز جهوده فيه
ومتأكده ان فيه بيننا اللي مبدع بالكمبيوتر وواللي بهندسة الديكور واللي بالمطبخ
واللي بكتابة الخواطر والأشعار واللي بالتصاميم ،،،،،،الخ
نبدأ باقل شي اقل شي قسم المطبخ
ماله داعي نجيب مواضيع منقوله فيه
يعني معقولة للدرجه هذي مافيه أحد بينا يطبخ ،،،
طيب موب شرط انتوا تطبخون أمهاتكم أخواتكم ان شاء الله لو شغالتكم ،، حتى لو تسوون شاي وتنزلونه مو مشكله وربي راضين فيه أهم شي يرحم والديكم فكونا من المنقول
ليش مايصير هالقسم على الاقل من مجهودنا ،،،
ثانياً : قسم الكمبيوتر والانترنت
مثلاً استخدمتوا برنامج مفيد أو جهاز جديد
ليش ماتسوون عنه موضوع متكامل مثلاً مقدمه عن البرنامج وشرح تحميله وتثبيته وبعدين طريقة استخدامه مع وضع رابط تحميل البرنامج وتفيدون فيه المنتدى
ثالثاً : قسم الصور ومقاطع الفيديو
مثلا اعجبتكم صور بالنت ليش ماتجمعونها بموضوع واحد المفروض مايقل عن 15 صوره وتعلقون عليها بأسلوبكم.
ايه وشي ثاني أنا أشوف مافيه فرق بين قسم الصور وقسم التسليه <<< يعني كيف اقولكم
الحين قسم الصور فيه مواضيع صور وضحك ووناسه وقسم التسليه نفس الشي مواضيع ضحك ووناسه بس الفرق بدون صور
فالأفضل لو يلغى قسم التسليه دام ان قسم الصور يؤدي الغرض فيه ضحك ووناسه وبالصور بعد
ويصير بداله قسم المكتبة مثلاً ،، مايحتاج اقول وش اهمية القراءه
هذا القسم يصير ننزل فيه كتب الكترونيه
نسلط الضوء على بعض الكتب القيمة نتناقش في أحدث اصدارات الكتب
نلخص الفوائد من الكتب اللي نقرأها
نسوي فيه مسابقة كل مجموعه من الاعضاء يختارون اي كتاب ويقرأونه ويلخصون لنا الفوائد منه
ويقدمونها في ملف ..ويصير منافسه لافضل ملخص ..عشان نشجع القراءه ونستفيد من اوقاتنا
هااه وش رايكم هي أفضل والا مواضيع
خذ لفة بالسيكل مع العضو الي تبي ؟؟ طوووط وقف وادخل \\\ عد إلى5واصفق البيضه براس عضو..,.,,,..\\\\ من 1 إلى 6 وكهرب العضو اللي تبيه !! \\ هــآت اسـم وادلـعـه لـك ..~ \\\
وغيرها من المواضيع اللي بقسم الترفيه والالعاب الغير هادفه تمااااااماً ولايستفاد منها ولا 0.000000001٪
مجرد ضياع وقت وتكثير مشاركات على غير سنع ...
رابعاً : نجي للقسم العام او قسم الاسره
مثلاً فيه ظاهره او موضوع بالمجتمع حبيتوا تكتبون عنها ،،وش المشكله لو كتبتوا
ترى مو لازم انه يكون الموضوع بلغه عربيه فصحى بحته وكأن سيبويه بيقص أعناقنا عآآآدي لو كتبتوا بأسلوبكم اعتبروا أنفسكم بمجلس وجالسين تسولفون
واكتبوا اللي بتقولونه بأسلوب بسيط ولغه عاديه وأهم شي حطوا في بالكم اي موضوع بتكتبونه بيكون فيه مين يوافق وفيه مين يعارض
ولازم نحترم وجهات النظر ونتقبل كل الأراء ونسيت أهم شي نراعي آداب الحوار ...
وهكذا في بقية الاقسام
وبالنسبه للقسم الاسلامي الله يخليكم لا تحطون شي بذمتكم اي موضوع بتنقلونه انقلوه من مصدر موثوق
من مواقع المشايخ الموثوق فيها أو كتب اسلاميه بلاش النقل من المنتديات
ماندري من وين مصدرها ولا صحة المعلومات اللي فيها عشان ماتحطون شي بذمتكم وتتحملون وزره ووزر من عمل به ليوم الدين
هذا دين مو شي سهل
وشي ثاني الله يخليكم كل شي الا الخطأ في الآيات القرآنيه والآحاديث النبوية لو حرف واحد
لو موضوعكم كان فيه آيات أو آحاديث انسخوها من المواقع المتخصصة عشان تنفادى الاخطاء اللي ممكن تغير معنى الايه
هذا موقع الشيخ سفر الحوالي فيه فهرس للآيات القرآنية اكتبوا بداية الآية بمستطيل البحث وتطلعلكم الآية كاملة
وهذا فهرس للأحاديث الشريفة
ودايم دااايم اكتبوا الايات والاحاديث داخل اقواس لا تدمجونها مع الكلام الثاني
وفيه شي بسيط بخصوص الردود
مسأله الاقتباسات بعض الاعضاء فاهم الاقتباس خطأ
اذا جاء يرد على موضوع يقتبس الموضوع كله كامل وبالنهايه يقول شكراً على الموضوع
وهذا يشوه منظر الصفحه ويزعج في قراءة الردود
تخيلوا لو كل واحد رد على الموضوع اقتبس الموضوع كله كيف بيصير شكل الصفحه
او كان الموضوع فيه صور بيصير تحميل الصفحه بطييييييء بسبب كثره الصور
ياليت تقتبسون الكلام اللي بتعلقون عليه فقط
ولو كان الموضوع طويل وبتعلقون على اكثر من جزء
فاقتبسوا على شكل أجزاء
بحيث ان الاقتباس يكون فقط للكلام اللي بتناقشونه
والافضل مايتجاوز 5 او 6 سطور
اللي مايعرف يسأل وكلنا هنا نفيد بعض
هذا اللي عندي الى هذي الحظه
اذا تذكرت شي رجعت اضيفه
اعذروني اذا فيه شي والا شي مثل ماقلتلكم الموضوع جاء بسرعه مارتبت له
كلنا نخطئ مافيه أحد كامل بس المهم مانستمر بالخطأ
والسلام عليكم ورحمة الله وبركاته
تعليق