هذه المرثية المتواضعة في المرحوم بإذن الله تعالى ( زيزوم القوافي )
حمد بن قريان العجمي $ بارووود $ رحمه الله واسكنه فسيح جناته

يا موت كافي ثم كافي وكافي
تاخذ من أصحابي مناعير وفهود
يا موت ما عيّنت غير السنافي
اللي بذل بالطيب والجود مجهود
يا موت ما عيّنت غير السنافي
اللي كسب من بيننا النعم والزود
يا موت ما عيّنت غير السنافي
اللي لنا بالمعضله زند وعضود
يا موت ما عيّنت غير السنافي
اللي من أفعاله رقينا به سنود
ليتك خذيت من العرب كل هافي
وخليت ابو لبيه حاضر وموجود
لا والله الا راح ريف الضعافي
خيره وجوده والعطا ماله حدود
من طيب راسه ابيض القلب صافي
حمد حمدنا بالوفا شيك مرصود
مدت يمينه بالسنين العجافي
جزله ولا تحتاج برهان وشهود
عوايده يا حشر ذبح الهرافي
للضيف والعاني ورثها من العود
رجل المواقف دايم الدوم وافي
والنَّاس في بيته مجاميع وحشود
والا القوافي صاغها باحترافي
كنه من البستان يقطف له ورود
بيطار يذكرني بصقر النصافي
بدع القصيده عنده سهود ومهود
تجي معانيها جزيله نظافي
بيت يقوله ما يجي فيه منقود
واللي جهل بارود فيه انحرافي
والا على ما قيل حاسد ومقرود
انكان ما يفهم بحور القوافي
ينشد ويلقى من هل القاف مردود
قلت الصراحه ما عليها اختلافي
ريف النشاما هو ذرا كل مضهود
مرحوم يا ستر البنات العفافي
مرحوم يا شيخ القوافي يا بارود
يا الله يا عالم سرير الخوافي
فردن صمد ندعوه ركّاع وسجود
عسى حمد قبره نعيم وعوافي
يفوز بالجنه عن النار مصدود
وصلاة ربي في ختام القوافي
على الرسول اعداد ما يخضر العود
(( فهد ))