.



روعه المنظر بشاطي هاف مون
أمس من بعد العصر والشمس حيه

البحر هادي وبانســـــامه شجون
يعطي المرتاد دفعــه معنويـــــه

يجذب اللي في جماله ينظرون
والطبيعه فيه سر الجاذبيـــــه

الســــحابه في الفضا يتعانقون
ترسم احلام القلوب العاطفيه

كنها وسط السما رسمة فنون
شكلت في الجو لوحه شاعريه

وانحدار الشمس يوحي بالغبون
بالفراق تذكر النفس الأسـيه

من أفقها للبحر تهوي بهــون
كنها تكتب لشطآنه وصيـــه

والشفق لونه كسا الأمواج لون
ترتدي لون الذهب في كل طيه

والرمال تشـــرّع الصدر الحنون
تحتضن موج البحر روحه وجيه

شفت موج البحر لضفافه يمون
بينهم ولف ومودتهم قويـــــــه

مثل خيلن غايره يتســــابقون
تقصدالشاطي لضيفـه حاتميه

يقدمون وفي رحابه يقلطـــون
والمرحب فارشن صدره تحيه

والكواكب والغيوم يشاركـــون
كلهم في الجود والضيفه سويه

كن مرزوم السحب عجة دخون
وكن بيد الشمس دله شاذليه

وكن صوت الموج قيتار ولحون
لحنها تطرب له النفس الزكيه

الطيور من الوناسه يرقصـــون
طائر النورس وغاق السقطريه

كنت أعيش الجو وحدي في غضون
ســــــــاعه وياليتها مرت بطيــه

البحر يجلي عن النفس الحــزون
منظـــره جذاب واجوائه نقيـــــه

أثر من حولي عـــرب يتفرجون
والأصابع تتهمني بالخطيـــــه

نظـــرة الزوار لي شك وظنون
في نظـــــرهم كل عزابي بليه

يوم عطله والعوايل يطلعـــون
واكثر الجلسات جلســه عائليه

الصغار على الشواطي يلعبون
والكبار مع عوايلهم نديـــــــه

شدني صوتن مع اللي يضحكون
التفتت آشوف له من حســن نيه

افتنتني نظــــــرة الرمش الفتون
واطعنتني طعنتن ماهي بريـــــه

هــــزة الخفاق من كل الركـون
واشرقت لي كنها شمس الضحيه

وانثنت ثني العواتي للغصـــــون
قصدها تلعب في اعصابي شويه

قمت أغض الطرف كي لا يشعرون
وادعي ان الله يعــــــدي هالعشيه

أصرف النظـره وانا كلي طعـــون
واتحلى في شــــيمنا الاوليـــــه

ما شبيهن للبحر غير العيــــــون
كيف بحجب نظـــرةالعين الشقيه

آهـ لو وضعي ووضعه يسمحون
والله ان تشــرق وانا باقي هنيه

لكن اخـــــــلاقي وديني يحكمون
كسّرت شوك الاماني في يديه

وبينما الجلسـه تكون أو لاتكون
والصراع اشتد بالفكر وخويه

قام يصدح شيخنا في المكرفون
بالأذان أعلن صــــلاة المغربيه

قلت لابليس ورفاقه تخساؤن
وبعدما صليت رحت الصيدليه



.


.