ياقلبي الملهوف وين أنت رايح؟=صبرك علي الله يخليك ليّه
من زود ماتنبض كسرت الصفايح=ولخبطت كل أوضاعي الداخليّه
وانا لو آطيعك فبعض النصايح=غرّبت عن ربعي وعن والديّه
لكنّ وعقول الرجال الرجايح=خلّت ملفّات العمر مستويّه
أسعى ورى شوف الوجيه الفلايح=لو كان فامريكا وفي ماربيّه
يامرحبا والهم زايل وزايح=لا شفت راعي الطيب والمقدريّه
حيّاك يادكتور والطيب فايح=من هاجسي والقافيه عالميّه
العود الأزرق والشحم والذبايح=وتمر الحسى والدلّه الشاذليّه
قليل في حقّك ونرجو السمايح=ياراعي القالات وآبو الحميّه
ما انته مدوّر للثنا والمدايح=لان التواضع في حياتك سجيّه
وانا تراني في معزّتك طايح=أقولها والله يشهد عليّه
قصايدك شبّت لهيب القرايح=يفداك أبو الطيّب وأخوه الحطيّه
لامست بأبياتك جميع الشرايح=واصبح لشعرك عندنا قابليّه
وداويت يادكتور كل الجرايح=اللي قبل لقياك خضرا نديّه
شاعر ولك فالعلم دور وكفايح=والعلم نور ووجهك يشعّ ضيّه
نجمك مثيل سهيل ساطع ولايح=إيدلّنا فالليله السرمديّه
يامرحبا مليون وارجو السمايح=ياراعي القالات وآبو الحميّه